Det er eit mål med revisjonen å bidra til at bygdene og grendene i villreinfjella kan ha ei positiv utvikling. Revisjonen skal gjennomførast innanfor dei økonomiske og tidsmessige rammene som er gitt gjennom tilskotet som fylkeskommunen fekk frå Miljødirektoratet til arbeidet. 

Heiplansekretariatet får mandat til å utarbeide prosjektbeskriving. For å sikre god medverknad tidleg i prosessen er det etablert ei styringsgruppe med representantar frå kommunane og fylkeskommunane, samt frå Statsforvaltar og villreinnemnda.

Formålet med planarbeidet

Målet er å oppdatere planen i tråd med ny kunnskap og betre ivareta villreinens leveområde, samstundes som ein legg til rette for positiv utvikling i bygdene og grendene i villreinfjella.

Bakgrunnen for revisjonen

Heiplanen er ein regional plan som omfattar dei to nasjonale villreinområda Setesdal Ryfylke og Setesdal Austhei. Planen gjeld for fire fylke og 16 kommunar. Heiplanen vart endeleg vedteken og godkjend av fylkestinga våren 2012, og Miljøverndepartementet stadfesta planen i juni 2013. Intensjonen med Heiplanen er å ivareta leveområda til Europas sørlegaste villreinstamme, samstundes som ein tek omsyn til lokalsamfunna sitt behov for langsiktig og positiv utvikling.

Villreinen i dei to sørlegaste villreinområda i Europa – Setesdal Ryfylke og Setesdal Austhei – er i dag klassifisert med dårleg og middels kvalitet etter kvalitetsnormen for villrein. Heiplanen, som er den regionale planen for desse områda, har ikkje i tilstrekkeleg grad sikra villreinens leveområde, og utviklinga går ikkje i ønskja retning. Med bakgrunn i ny kunnskap om villrein, nasjonale planretningslinjer, nasjonale forventningar, samt forslag som ligg i tiltaksplanar for villrein, sest det behov for ein avgrensa og målretta revisjon av Heiplanen.

Stortingsmelding 18 – Ein forbetra tilstand for villrein (villreinmeldinga) legg føringar for ei styrkt og meir heilskapleg forvaltning av leveområda til villreinen. Meldinga peikar på behovet for å ivareta villreinen si langsiktige overleving gjennom restriktiv arealforvaltning, betre koordinering av ferdsel, styrkt helseovervaking og restaurering av leveområda. Meldinga slår fast at det skal utarbeidast tiltaksplanar for å betre tilstanden for villrein i dei områda som ikkje tilfredsstiller kravet om minimum middels kvalitet etter kvalitetsnormen for villrein. 

I tråd med stortingsmelding 18 vart det mot slutten av 2024 lyst ut ei tilskotsordning, kalla Natursats, der det vart opna for å søkje om tilskot til revisjon av regionale planar for villreinfjella. På vegner av Heiplansekretariatet søkte Agder fylkeskommune om tilskot på 2 millionar kroner over 2 år, til ei avgrensa og målretta revisjon av Heiplanen. I brev frå Miljødirektoratet datert 20.06.2025 har fylkeskommunedirektøren fått tilsegn om tilskot.

I dei nasjonale forventningane til regional og kommunal planlegging for perioden 2023–2027 er villreinen løfta spesielt fram som ein viktig del av norsk natur og kultur. I regjerings forventning nr. 58 står det: «Villreinens leveområder sikres, og vedtatte regionale planer for villreinfjella oppdateres i samsvar med ny kunnskap og følges opp i den kommunale planleggingen». Vidare står det: «Det er viktig at fylkeskommunene og kommunene legger stor vekt på resultatene fra klassifiseringen av villreinområdene og arbeider aktivt for å oppnå kvalitetsmålene for de nasjonale villreinområdene. De regionale planene for fjellområdene med villrein er et viktig verktøy for å få til dette.»

Dei statlege planretningslinjene for arealbruk og mobilitet underbygger dette og inneheld ei eiga føring for villrein. I punkt 3.8 står det: «Areal-planleggingen skal bidra til å nå målet om en helhetlig og restriktiv arealforvaltning i villreinfjellet. Dette innebærer at det skal være en høy terskel for inngrep i villreinens leveområder.» Dette inneber at kommunar og andre planstyresmakter skal leggje særleg vekt på omsyn til villrein ved vurdering av nye arealinngrep, og sikre at villreinens leveområde blir verna mot fragmentering og nedbygging.

Organisering og medverknad

Det er avgjerande ved revisjon av Heiplanen at det blir sikra god medverknad. Det er først gjennom god forankring i kommunane at Heiplanen kan bli eit effektivt verkemiddel for å nå målet om å betre ivareta villreinen sine leveområde i vår del av landet. Korleis arbeidet skal organiserast vil gå fram av planprogrammet, som er under utarbeiding. 

Det ble oppretta ei styringsgruppe for arbeidet med planprogrammet og deretter revisjonen. Kvar av dei 16 kommunane vart spurde om å stille med ein representant på høgt politisk nivå, ved ordførar eller varaordførar, og deriblant leier for verneområdestyret. I tillegg bør leier av villreinnemnda og Statsforvaltar delta. Heiplansekretariatet vil tidleg søkje samarbeid administrativt med kommunane, Statsforvaltar, sekretær for verneområdestyret, samt sekretær for villreinnemnda. På oppfordring frå Heiplansekretariatet har Agder fylkeskommune sakt seg villig til å leie arbeidet med revisjonen.

Tentativ tidsplan for revisjonsprosessen