Songar Sigrid B. Berg. Ingvil Skeie Ljones

I Agder er vi utruleg heldige som har ein internasjonalt anerkjend folkemusikktradisjon skrive inn på UNESCO-lista for immateriell kulturarv. No skal folkemusikkutøvarar frå Setesdal på Den kulturelle skulesekken-turné til Kristiansand. Vi har teke ein liten prat med ein av utøvarane, Sigrid B. Berg (songar, 41 år).

Kva er det de ynskjer med dette opplegget?
Vi håpar å formidle den gamle kulturen gjennom rammer som er kjende for elevane. Nokre av dei kjenner kanskje til noko av dette frå før, utan å ha tenkt over at det er folkemusikk. Vi har med alle elementa som kjenneteiknar folkemusikken frå Setesdal, og håpar at elevane dermed vil få eit bilete av kva dette er.

Kvifor byrja du å drive med folkemusikk og -dans?
Med ei mor som var svært aktiv i folkemusikkmiljøet (Kirsten Bråten Berg), vart det like naturleg som familie. Det var eit aktivt barne- og ungdomsmiljø i leikarringen som eg var med i i mange år. Då eg var 8–9 år fekk eg sommarjobb på Sylvartun, som var ein kulturell turistdestinasjon like ved der eg vaks opp. Eg køyrde bort med hest og kjerre i bunad for å kvede for turistar. Der var det eit aktivt folkemusikkmiljø, særleg med spelemenn som gjekk i lære hos Hallvard T. Bjørgum.

Utøvarar frå Setesdal dansar setesdalsgangar. Knut Utler

Kva gir det deg å få drive med folkemusikken og -dansen?
Det er megasosialt! Artistar og folk som liker folkemusikk lagar sine eigne miljø over heile landet – og ein er alltid velkomen. Slik er det òg i Setesdal. Vi reiser rundt i landet på kappleikar, som er konkurransar i folkemusikk og dans. Slik blir det som ein veldig stor familie. I tillegg er eg glad i historie og det gamle. Eg likar tanken på at nokon for veldig lenge sidan har rørt ved det vi tek fram att og brukar i dag.

Kva er det som er så unikt med dette?
Om noko kan overleve i hundrevis av år berre ved å gå frå person til person, må det vere ganske unikt og verdifullt. Dette er vår felles arv frå menneska som var her før oss, og det er fint å tenkje på at ein kan vere ein del av det ved å halde det i live.

Daniel Sandén Warg spelar hardingfele Knut Utler

For dei som ikkje går på skulane de skal besøkje, og som ynskjer å vite meir om folkemusikk og -dans frå Setesdal – kvar kan dei best oppleve dette?
NRK har fleire spanande program frå Setesdal i arkivet sitt. I tillegg kjem kristiansanderen Kristian Landmark snart med ein dokumentar på NRK. Om ein vil oppleve det live, er det fleire konsertar med Kulturpatrulja i løpet av sommaren. Dette er ei gruppe ungdomar og vaksne som held små konsertar rundt om i Setesdal i sommarferien. Landskappleiken på Hovden i juni blir jo legendarisk, for dette er faktisk NM i folkemusikk.