Hausten er tid for viltpåkøyrslar – kva skal du gjere om det skjer?

Hausten er tida på året då det skjer flest viltpåkøyrslar. Å køyre på ein elg eller eit rådyr kan vere både skremmande og farleg. Ein viltpåkøyrsel medfører materielle skadar, lidingar for det trefte dyret og kan også medføre personskade.

Viltband knytt til tre langs med veg. Bilete. - Klikk for stort bildeViltband er viktig å ha i bilen dersom ulykka er ute. Agderfk

I veke 45 (7. - 11. november) vil Agder fylkeskommune og kommunane i Agder, ha eit spesielt fokus på viltpåkøyrslar. Målet er å få ut informasjon om kva den enkelte kan gjere for å redusere risikoen for viltpåkøyrslar og kva du skal gjere viss uhellet skjer.  

– Kort fortalt vil vi, ei rekke stader i kvar kommune, der innbyggjarane er innom med bil, dele ut såkalla viltband. Dette er eit band som bør vere fast inventar i alle bilar. Det blir brukt ved ein viltpåkøyrsel til å merke av staden der påkøyrselen skjedde, slik at staden blir enklare å finna igjen for dei som har ansvar for oppfølging etter ei viltulykke, seier Katrine Skajaa Gunnarsli, rådgivar i avdeling for berekraftig utvikling i Agder fylkeskommune. 

På viltbandet er det tydeleg beskrive kva ein skal gjera i ein slik situasjon. Her kan ein også finne enkle nyttige fakta om åtferda til hjortevilt og kva ein kan gjera for å redusera risiko for påkøyrslar. 

– Agder fylkeskommune og Agder-kommunane håpar vi med å løfta dette temaet kan bidra til færre viltpåkøyrslar og at egdene får god informasjon om kva ein skal gjera dersom uhellet er ute, seier Gunnarsli.

Kvar kan du få tak i viltbandet? 

Viltbandet kan du finne på servicetorga i alle kommunane i Agder og i Agder fylkeskommunes lokale i Kristiansand og Arendal. I tillegg har ei rekke butikkar, bensinstasjonar og bilforhandlarar viltbanda for utdeling.

Oversikt over stader ein kan få tak i viltband (XLSX, 25 kB)

Vil du vita meir om fallviltarbeidet i kommunen din ta gjerne kontakt med viltansvarleg i kommunen.  

Til toppen