No gjev vi ut ein slags oppfølgjar, med fokus på instrumentaltradisjonane på fele og hardingfele i same geografiske område. Feletradisjonane i den vestlege delen av Agder, tidlegare Vest-Agder fylke, er for mange lite kjend. Dei er òg lite dokumentert i skriftlege kjelder. Tradisjonane har levd ein ganske anonym tilværelse, og det verkar som om dei av ulike grunnar har gått under radaren i dei miljøa som er opptatt av folkemusikk. Ikkje minst difor er dette materialet svært spennande og interessant.

Heldigvis ligg det opptak i ulike folkemusikkarkiv. Av desse er Agder folkemusikkarkiv det viktigaste, arkivet som blei 25 år i 2023. Og heldigvis finst det òg nokre ildsjeler som i årevis har ivareteke kunnskap og formidla den vidare til andre. Ingen har arbeidd så systematisk og grundig med å transkribere instrumentalmusikk frå vest på Agder som Ånon Egeland. Ånon er folkemusikar, musikkforskar og skribent og ein utømmeleg kjelde for både slåttemateriale og vokalmusikk. Det er mange både i inn- og utland som har lært og latt seg inspirere av han.

Med utgjevinga Ein gammel ein a´ farses, Felespill vest på Agder, blir kulturskatten endå meir tilgjengeleg. Og forhåpentlegvis fører det til at våre rike og særeigne tradisjonar, blir teke meir i bruk - tradisjonar som òg i vår tid kan gi inspirasjon og opplevingar for både utøvarar og publikum.

Agder fylkeskommune har nytta ta:lik forlag til å gje ut boka, som òg inkluderer to CD-ar. Musikken kan òg høyrast på strøymetenester som Spotify.